|
| 陳志雲昨日首次公開露面，指出連日傳媒的報道不一定是事實。（文匯報） |
陳志雲發言全文
各位傳媒界的朋友，大家好，由三月十二號到而家，我一直無公開露面，主要的原因係因為經過三月十一號同埋十二號呢兩日，我看見咁多位果種忠於職守的採訪表現，令我憂慮到，如果唔係響一個安排好的情況之下公開現身，可能會影響到大家的安全，引起混亂，又或者導致到使用緊同一個公共空間、又或者係私人空間的其他朋友不便。所以我希望藉住今日呢個咁有秩序的安排同大家見面，滿足大家響工作上的需要，響往後的日子，大家唔再需要響我屋企門口度等，咁多日以嚟，辛苦咗大家。
正如先前Ivan（鄧耀榮）所講，由於案件仍然響調查的階段，所以請大家見諒，我今日唔能夠提及有關案件的任何細節。不過，有一啲大家有興趣知道的事都仲係可以一提，例如三月十二號，點解我離開ICAC的時候，會戴住口罩呢？我知道好多朋友響出面等緊我，所以離開當日呢，我係嘗試整理一下自己的儀容，不過好可惜我唔小心用剃刀刮損咗塊面，我戴住口罩，係避免大家誤會我面上的傷痕係來自ICAC（廉政公署）。
大家響媒體上面睇倒的報道，唔一定係事實。響十二號至到十七號期間，所有的報道指出，我係藏身家中。事實上並唔係咁，我一如以往有外出同朋友見面，出街食飯唔單止係十七號，亦即係昨晚畀部分傳媒影倒的果一晚，仲去過公立醫院果度覆診添。至於其他與事實不符的報道，我唔一一例舉說明喇。
響呢度，我由衷咁向連日以來同我發出無數短訊、問候、關懷、支持同對我表示信任的朋友，深表謝意。當然我亦都要好感謝旺角花墟果位賣碌柚葉的老闆，多謝你的買一送一。
我想同大家講，我生活得好好，唔需要為我憂慮，但係講到底，我的生活上面係唔係完成冇起到變化呢？呢一點係冇可能的，但想深一層，有邊一個人的生活從來冇遇上過變化呢？如果你都遇上啲變化，一啲莫名其妙的變化，請你唔好驚，唔好亂、唔好放棄，因為真的假不了，假的真不了。多謝大家的支持、關懷同鼓勵。 |
